اعلم وادر مافي "الــــهواجر" صعاليك ....

اللـي يصرفنـي لاقلـت باجيـك = حلفت لو ماالقى معازيـب ماجيـه
ياشيخ انا غني واقول الله يغنيـك = اللي عطـاه الله القناعـه بتغنيـه
مطامعـي متعـديـات مخابـيـك = اطمع مزايا الرجل مطمع مخابيـه
لاجيتك اشحذ قول مانيب معطيـك = اجيك ضيف واجب الضيف يبغيـه
هلا وسهـلا وارحـب الله يحييـك = كرامـة الضيـف يبيهـا وتقريـه
ماقول فيك قصور صيتـك يكفيـك = خايف على حظي ولا نيب مهفيـه
وشيخ ولد شيخ ولا فيـك تشكيـك = لاشـك شيخـا لايبينـي ولابيـه
لاهوب كرهـا لـك ولادقـة فيـك = طبعك يخرب طيبك اللـي تسويـه
منته ببوي اقـول عونـك ولبيـك = سمّ ونعم وافـرح ولاهـوب لبيـه
لبيه لو تكتب ثمنها علـى شيـك = حبة خشم جاااااااااالس ولبيه مافيه
اعلم وادر مافي الهواجر صعاليـك = شـئ ينـزل روسنـا ماندانـيـه
ماحـن للخـرده عبيـد مماليـك = لو تملك الخرده من الهيـه للهيـه
نذر ويمين اثنيـن والثالثـه ذيـك = مااخضع براسي للمصالح ووطيـه
نفسي عزيزه فوق سحب السما تيك = اهين نفسـي ليـه واذ لهـا ليـه
الكنز عز النفـس للاعلـى يعليـك = من عـز نفسـه للعوالـي تعليـه
بصيحلك يا اللي صياحي بيصحيك = اللي بيصغي للنصيحـه بتصحيـه
لامنـك خليـت المعـزه تخلـيـك = مهيـب دكـان تبيعـه وتشريـه
ماشي تمشيهـا وهـي ماتمشيـك = ما يمشي اللي يبي ماشي تمشيـه
يااللي لك اذن تسمع اللي يوصيـك = وصّاك مطلق وابومطلق موصيـه